Кәсіподақ жаңалықтары

«Әділет» Кәсіподағы «Астана дарыны» дарындылықты дамыту және психологиялық сүйемелдеу орталығымен бірлесіп «Білім беру ұйымдарындағы қақтығыстарды басқару» тақырыбында педагог-психологтарға семинар өткізді.

Бұл семинар «Әділет» Кәсіподақ ұйымының төрағасы Б. Әлиевтің Санкт-Петербург кәсіподақтар гуманитарлық университетінде қорғаған диссертациялық жұмысын тәжірибеге ала отырып педагог-психологтарға көмек көрсету мақсатында ұйымдастырылды.

Семинардың практикалық бөлімінде Б. Әлиев А. Я. Анцуповтың (Мектеп ұжымындағы қақтығыстардың алдын алу) модульдік әлеуметтік тестінің әдістемесі мен ерекшеліктері туралы өз тәжірибесімен бөлісті. Қатысушыларға мысал ретінде қарым-қатынасты бағалау формалары ұсынылды.

Әдіс ең алдымен ұжымдағы (сыныптағы, топтағы) қарым-қатынастар мен тұлғааралық қақтығыстарды зерделеу үшін қолданылады, сонымен қатар келесіні анықтауға мүмкіндік береді:

- жасырын және көрсетілген қақтығыстарды, олардың қазіргі уақыттағы ауырлығын;

- сауалнамаға қатысушының жалпы ұжымға қарым-қатынасын;

- бейресми лидерлер және аутсайдер лауазымдарын атқаратын адамдарды;

- әрбір қызметкердің тиімділігі, оның күшті және әлсіз жақтары, топ рейтингіндегі орнын;

- білім берудің даму болашағы мен басым бағытын;

- іскерлік және әлеуметтік-психологиялық қабілетін.

Модульдік құрылымның арқасында әдістеменің қолдану аясы кең: мемлекеттік және коммерциялық ұйымдардағы бөлімдерден мектеп оқушыларынан құралған ұжымдарға дейін.

Сондай-ақ, семинар аясында Б. Әлиев қатысушыларға «Әділет» Кәсіподағының жұмысы, Нұр-Сұлтан қаласының Білім басқармасымен Әлеуметтік әріптестік туралы келісімнің мазмұны, білім беру ұйымдарының ұжымдық шарттары, еңбек заңнамасының сақталуына қоғамдық бақылау, кәсіподақ мүшелеріне материалдық көмек көрсету туралы ақпарат берді.

Білім беру ұйымының ШЖҚ-ға көшуі кезінде қызметкерлерге еңбекақы төлеу мәселесі талқыланды. Басқарма мен Кәсіподақ арасындағы Келісімге сәйкес қызметкерлерге «Азаматтық қызметшілерге, мемлекеттік бюджет қаражаты есебінен ұсталатын ұйымдардың қызметкерлеріне, қазыналық кәсіпорындардың қызметкерлеріне еңбекақы төлеу жүйесі туралы» Қазақстан Республикасы Үкіметінің 2015 жылғы 31 желтоқсандағы № 1193 қаулысында көрсетілген қосымша төлемдер мен үстемеақылардың барлық түрлері сақталатынын еске саламыз.

Тексеру органдары тарапынан жазалауды болдырмау үшін, Қазақстан Республикасының Әкімшілік құқық бұзушылық туралы кодексінің 97-бабы 3-тармағына сәйкес ұжымдық шарт, келісім бойынша міндеттемені орындамау немесе бұзу – 400 АЕК (1 225 200 теңге) мөлшерінде айыппұл салуға әкеп соғатынын еске саламыз.

Сонымен қатар, семинарға қатысушыларға еңбек заңнамасының нормалары, «Білім туралы» және «Педагог мәртебесі туралы» Заңдары, педагогтерге оның ішінде методистерге еңбекақы төлеу жүйесіндегі қосымша төлемақылардың жаңа түрлері, сонымен қатар білім жүйесінің құқықтық заңнамалық актілері, оның ішінде педагогтарды аттестаттау ережесіне енгізілген өзгерістер түсіндірілді.

Іс-шара еркін диалог форматында жүргізілді. Кездесу соңында педагогтар қызықтырған сұрақтарына жауаптарын алды.

Семинарды ұйымдастыруға ықпал еткен Нұр-Сұлтан қаласының Білім басқармасына және «Астана Дарыны» орталығына алғысымызды білдіреміз.